सशस्त्र प्रहरी महानिरीक्षक नारायण दत्त पौडेल रसुवाको भोटेकोशी नदीमा आएको बाढी प्रभावित क्षेत्रको स्थलगत अनुगमन गर्नुभई सशस्त्र प्रहरी बल नेपालबाट भएका खोज, उद्धार तथा राहत कार्यको बारेमा जानकारी लिनुभएको छ ।
सोही क्रममा नेपाली सेनाको नम्बर १ सैन्य तालिम केन्द्र पुग्नु भएका माननीय गृहमन्त्री सुधन गुरुङसँग सशस्त्र प्रहरी महानिरीक्षक पौडेलले बाढी प्रभावित क्षेत्रमा संचालन गरिएको खोज, उद्धार तथा राहत लगायतका कार्यको थप कार्ययोजनाको बारेमा समेत छलफल गर्नुभएको थियो ।
सशस्त्र प्रहरी महानिरीक्षक पौडेल बाढी प्रभावित क्षेत्रमा भईरहेको खोज तथा उद्धार कार्यको वास्तविक अवस्था, परिचालन र व्यवस्थापनको वस्तुस्थिती बुझ्न सशस्त्र प्रहरी बल नेपाल नं. १९ गुल्म नुवाकोट पुग्नुभई खोज तथा उद्धारमा खटिएका सशस्त्र प्रहरी कर्मचारीहरुलाई विपद्मा परेका नागरिकहरुको सेवा, सुरक्षा र उद्धारमा कुनैपनि कसर बाँकी नराखी कार्य गर्न निर्देशन दिनुभएको छ ।
सोही अवसरमा उहाँले बाढी प्रभावित क्षेत्रमा खटिनु भएका सशस्त्र प्रहरी बल नेपाल नं. ३ गढिमाई वाहिनी मुख्यालय मकवानपुरका वाहिनीपति सशस्त्र प्रहरी नायव महानिरीक्षक किरण बस्नेतबाट सशस्त्र प्रहरी बल नेपालको परिचालन, स्रोत साधनको व्यवस्थापन तथा विशेषज्ञ टोलीबाट भईरहेको खोज तथा उद्धार कार्यको बारेमा जानकारी लिनुभएको थियो ।
त्यसैगरी महानिरीक्षक पौडेलले नुवाकोट जिल्लाको विदुर नगरपालिका–४ स्थित पृथ्वी माध्यमिक विद्यालयमा स्थापना गरिएको सशस्त्र प्रहरी बल नेपालको फिल्ड अस्पताल तथा सोही नगरपालिका–५ देवीघाटस्थित आयुर्वेदिक स्वास्थ्य केन्द्रमा रहेको होल्डिङ सेन्टरको समेत अवलोकन गर्नुभई उक्त स्थानमा खटिएका सशस्त्र प्रहरी कर्मचारीहरुलाई स्वास्थ्य सेवा तथा व्यवस्थापनमा प्रभावकारी कार्य गर्न हौसला प्रदान गर्नुभयो ।
साथै उक्त क्षेत्रमा सशस्त्र प्रहरी बल नेपालको विशेषज्ञ टोलीबाट भईरहेको कामकारवाहीको बारेमा जानकारी लिनुकासाथै डग स्नीफिङ तथा उद्धार टोलीले गरेको कार्यको समेत स्थलगत अनुगमन गर्नुभई सो क्षेत्रमा खटिएका सशस्त्र प्रहरी कर्मचारीहरुलाई उच्च मनोवलकासाथ कार्य गर्न निर्देशन दिनुभयो ।
बाढी प्रभावित क्षेत्रमा सशस्त्र प्रहरी महानिरीक्षक पौडेलले सो क्षेत्रका स्थानिय वासिन्दाहरुसँग छलफल गरी त्यस ठाउँको वस्तुस्थितीबारे जानकारी लिनुकासाथै विपद्को कठिन घडीमा नेपाल सरकारको पूर्ण सामथ्र्यकासाथ खोज, उद्धार र राहत कार्यलाई निरन्तरता दिईरहने समेत बताउनुभयो ।
