सशस्त्र प्रहरी बल, नेपालले आउँदै गरेका दशैँ, तिहार, छठ लगायतका चाडपर्वहरूलाई लक्षित गरी सीमा सुरक्षा, नागरिकको सुरक्षा, सार्वजनिक सम्पत्ति तथा महत्वपूर्ण संरचनाको सुरक्षा, विपद् व्यवस्थापन तथा प्रतिकार्य सुनिश्चित गर्दै सुरक्षित, शान्तिपूर्ण र मर्यादित वातावरणमा चाडपर्व मनाउने अवस्था सिर्जना गर्न ‘चाडपर्व लक्षित विशेष सुरक्षा योजना, २०८३’ तयार गरी असोज २२ गतेबाट देशभर लागू गरेको छ । सुरक्षा व्यवस्थापनलाई ध्यानमा राखी सशस्त्र प्रहरी बल, नेपालले २८ हजार १ सय २६ जनशक्ति परिचालित गरेको छ भने ४ हजार ५ सय जनशक्ति युनिटमा तत्काल खटाउन सक्ने गरी तयारी हालतमा राखिएको छ । चाडपर्वको समयमा सीमावर्ती इलाका तथा अन्य स्थानहरूमा अप्रिय घटना हुन नदिन आवश्यक स्रोतसाधन र प्रविधिसहित सुरक्षा तैनाथी बढाइएको छ । देशभरका सशस्त्र प्रहरी बल नेपालका इकाईहरूले सीमा इलाकामा हुन सक्ने सीमा अपराधलाई न्यूनीकरण गर्दै नेपाली नागरिक एवं नेपाल प्रवेश गर्ने पर्यटकहरूको सुरक्षित एवं सहज आवागमनको व्यवस्था मिलाइएको छ । त्यस्तै जुनसुकै प्रकारको विपद्मा परेका सेवाग्राहीहरूको उद्धार कार्यमा सहयोग पुर्याउन भारत र चीनतर्फका समकक्षी सुरक्षा निकायहरूसँगको समन्वय र सहकार्यमा १ सय ४१ स्थानमा नागरिक सहायता कक्ष (Help Desk), १६ स्थानमा नागरिक स्वास्थ्य कक्ष (Health Desk) र १३ स्थानमा पर्यटक सहायता कक्ष (Tourist Help Desk) स्थापना गरिएको छ । समकक्षी सुरक्षा निकायहरूसँगको समन्वयमा सीमावर्ती इलाकामा संयुक्त गस्ती समेत सञ्चालन भइरहेको छ । झापाको काँकडभिट्टा, पर्साको वीरगंज, रुपन्देहीको बेलहिया र बाँकेको जमुनाह नाकामा अवैध हातहतियार, विष्फोटक पदार्थ र लागूऔषध पहिचान गर्न सक्ने तालिम प्राप्त स्निफिङ डग (K–9 Team) समेत परिचालन गरिएको छ । त्यसैगरी दशैँ, तिहार, छठ तथा अन्य चाडपर्वहरूमा हुनसक्ने आपराधिक क्रियाकलापहरूको रोकथाम एवं नियन्त्रणका साथै मुख्य राजमार्गमा हुनसक्ने घटना तथा दुर्घटनाहरू न्यूनीकरण र समयमै उद्धार गर्न सक्नेगरी ३७ स्थानमा एम्बुलेन्ससहितको आकस्मिक उद्धार टोली परिचालन गरिएको छ । चाडवाडको समयमा हुनसक्ने ठूलो दुर्घटनाको जोखिमलाई ध्यानमा राखी एकैपटक ठूलो संख्यामा घाइते बिरामीलाई अस्पतालसम्म लैजान सकिने गरी मास क्याजुअल्टी भेईकल (M.C.V.) समेत सातै प्रदेश र उपत्यकामा गरी १६ स्थानमा तैनाथ गरिएको छ । प्राकृतिक तथा मानवसृजित विपद्को अवस्थामा तत्काल परिचालन हुनसक्ने गरी धनकुटाको मुलघाट, बाराको निजगढ, धादिङको आदमघाट, म्याग्दीको बेनी, दाङको भालुवाङ, सुर्खेतको चिप्ले, डडेल्धुराको अमरगढी र सिन्धुलीको खुर्कोट लगायत देशभर ५५ वटा अस्थायी मनसुन विपद् प्रतिकार्य बेश तथा १६ वटा स्थायी विपद् बेशहरूमा आवश्यक स्रोतसाधनसहित तालिम प्राप्त दक्ष जनशक्ति तयारी हालतमा राखिएको छ । चाडपर्व लक्षित सुरक्षा योजना अन्तर्गत दैनिक ४ सय १५ स्थानमा पिकेट, ४ सय १८ स्थानमा चेक प्वाइन्ट, ६ सय १ वटा पैदल गस्ती, ५ सय ५५ वटा मोबाइल गस्ती, १ सय ८२ वटा लामो दुरीको गस्ती, १ सय ४६ वटा क्यु.आर.टी., १४ वटा बम डिस्पोजल टीम, ३७ वटा एम्बुलेन्स, २ सय ५१ वटा विपद् उद्धार टीम र ११ स्थानमा गोताखोर टोली २४सैँ घण्टा तैनाथ रहने छन् । सीमावर्ती क्षेत्रको सुरक्षा संवेदनशीलतालाई मध्यनजर गरी दैनिक सीमा नाका पिकेट ५ सय ४ वटा, सीमा लिङ्क पेट्रोल ४२ वटा एवं बोर्डर इन्टर्याक्सन टिम (BIT) ६ वटा परिचालन गरिएको छ भने चाडपर्व अवधिभर आवश्यकताको आधारमा समकक्षीसँग ९ सय २४ वटा संयुक्त सीमा गस्ती सञ्चालन गर्ने योजना समेत रहेको छ । सुरक्षामा प्रविधिको प्रयोगलाई उच्च प्राथमिकतामा राखी संवेदनशील स्थानहरूको सुरक्षा निगरानीका लागि आवश्यकता अनुसार २१ वटा ड्रोन परिचालन गरिएको छ, भने सीमा नाकाहरूका महत्वपूर्ण स्थानमा जडान गरिएका ४ सय १२ सीसीटिभी क्यामेरा मार्फत प्रधान कार्यालय, बाहिनी, गण तथा सम्बन्धित युनिटहरूबाट २४सै घण्टा अनुगमन गर्ने व्यवस्था मिलाइएको छ । त्यसैगरी समग्र सुरक्षा योजनाको प्रभावकारी कार्यान्वयनका लागि देशभर ९४ वटा अनुगमन ड्युटी टोली खटाइने छ । साथै आपद् विपद्मा परेका नागरिकहरुले सहयोगका लागि सशस्त्र प्रहरी बल, नेपालको टोल फ्री नम्बर १११४ र सीमा हटलाइन नम्बर ९८५१२६०७३० मा सम्पर्क गर्न सक्ने व्यवस्था मिलाइएको छ ।
