काठमाडौं,
सशस्त्र प्रहरी महानिरीक्षक शैलेन्द्र खनालले नेपाल एपीएफ क्लवको आयोजनामा यही चैत्र १० गतेबाट संचालित ‘पन्ध्रौं राष्ट्रव्यापी कृष्णमोहन स्मृति खुल्ला व्याडमिन्टन प्रतियोगिता–२०७५’, ‘एघारौं सहवीर स्मृति खुल्ला लनटेनिस प्रतियोगिता–२०७५’ र ‘सशस्त्र प्रहरी महानिरीक्षक छैठौं राष्ट्रिय खुल्ला महिला भलिबल प्रतियोगिता–२०७५’ को चैत्र १५ गते समापन गर्नुभयो ।
सशस्त्र प्रहरी बल, नेपाल प्रधान कार्यालय हल्चोक स्वयम्भुमा आयोजित प्रतियोगिताको समापन समारोहमा सशस्त्र प्रहरी महानिरीक्षक खनालले विजयी टिम तथा खेलाडीहरुलाई शिल्ड, पदक, प्रमाणपत्र तथा नगद पुरस्कार प्रदान गर्नुभयो ।
सशस्त्र प्रहरी महानिरीक्षक खनालले प्रतियोगिता संचालनमा सहयोग पुर्याउनुहुने विभिन्न संघ संस्था, रेफ्री तथा अफिसियलहरुलाई समेत प्रशंसा पत्र तथा मायाको चिनो प्रदान गर्नुभयो ।
सोही समारोहमा सशस्त्र प्रहरी परिवार महिला संघकी अध्यक्ष श्रीमती सरिता कणेल खनालले महिला भलिबल खेलतर्फ सर्वोत्कृष्ट हुने नेपाल एपीएफ क्लवका महिला भलिबल टिमकी रेश्मा भण्डारीलाई स्कुटर प्रदान गर्नुभयो ।
समारोहमा पूर्व सशस्त्र प्रहरी महानिरीक्षकहरु सनतकुमार बस्नेत, शैलेन्द्रकुमार श्रेष्ठ, दुर्जकुमार राई र सिंहबहादुर श्रेष्ठ तथा सशस्त्र प्रहरी परिवार महिला संघकी पूर्व अध्यक्ष श्रीमती कल्पना थापा लगायत नेपाल भलिबल संघका अध्यक्ष मनोरन्जन शर्मा, नेपाल लनटेनिस संघकी अध्यक्ष ज्योती राणा, नेपाल ब्याडमिन्टन संघका अध्यक्ष रामजीबहादुर श्रेष्ठ, अग्नि ईन्कर्पोरेट प्रा.लि. महिन्द्राका कार्यकारी निर्देशक अर्जुन शर्मा, कृष्णमोहन नुडुप स्मृति प्रतिष्ठानका अध्यक्ष गोविन्ददास श्रेष्ठ लगायतका महानुभावहरुले प्रतियोगिताका विभिन्न इभेन्ट्सहरुमा विजयी तथा विभिन्न विधाका उत्कृष्ट खेलाडीहरुलाई पुरस्कार प्रदान गर्नुभयो ।
सो अवसरमा सशस्त्र प्रहरी महानिरीक्षक शैलेन्द्र खनालले सशस्त्र प्रहरी बल, नेपालले निरन्तर रुपमा राष्ट्रियस्तरका यस्ता प्रतियोगिताहरु संचालन गरी राष्ट्रको खेलकुद क्षेत्रमा महत्वपूर्ण योगदान पु¥याईरहेको चर्चा गर्नुहँुदै नेपाल एपीएफ क्लवका खेलाडीहरुले विभिन्न राष्ट्रिय तथा अन्तर्राष्ट्रिय पदक समेत प्राप्त गरी संगठन र राष्ट्रको नाम चिनाउन सफल भएको बताउनुभयो ।
उहाँले प्रतियोगिता सफल रुपमा सम्पन्न गर्न सहयोग पुर्याउने विभिन्न खेलकुद संघ संस्था, प्रशिक्षक, अफिसियल तथा महानुभावहरुप्रति आभार प्रकट गर्नुहुँदै यस्ता प्रतियोगिताबाट क्षमतावान खेलाडीहरुको पहिचान हुनुकासाथै भोलीका दिनमा खेल क्षेत्रमा नवप्रतिभाहरुको आगमन हुने विश्वास व्यक्त गर्नुभयो ।
शुक्रबार सम्पन्न व्याडमिन्टन प्रतियोगिताको पुरुष एकलतर्फको फाइनल खेलमा नेपाल एपीएफ क्लवका दिपेश धामीले सिल्क ग्रुपका प्रिन्स दाहाललाई २१–१२, १८–२१ र २१–१४ ले तथा महिला एकलतर्फको फाईनल खेलमा त्रिभुवन आर्मी क्लवकी रसिला महर्जनले नेपाल एपीएफ क्लवकी जेसिका गुरुङ्गलाई २१–१४, १३–२१ र २१–१८ ले पराजित गरी उपाधि हात पारेका छन् ।
यसैगरी आजै सम्पन्न लनटेनिस प्रतियोगिताको पुरुष एकलतर्फको फाइनल खेलमा नेपाल एपीएफ क्लवका इभानोई लिसानोवीकले डेनमार्कका निकोलाई रास्त्रुपलाई ७–६ र ६–२ ले पराजित गरी उपाधि हात पार्न सफल भएका छन् ।
यसैगरी आजै सम्पन्न लनटेनिस प्रतियोगिताको महिला एकलतर्फको फाइनल खेलमा सुनसरीकी प्रेरणा कोईरालाले पोखराकी गंगा शर्मालाई ६–३ र ६–३ ले पराजित गरी उपाधि हात पारेकी छिन् ।
यसैगरी ‘सशस्त्र प्रहरी महानिरीक्षक छैठौं राष्ट्रिय खुल्ला महिला भलिबल प्रतियोगिता–२०७५’ को उपाधि नेपाल एपीएफ क्लबले जितेको छ ।
सशस्त्र प्रहरी बल नेपाल प्रधान कार्यालय हल्चोक स्वयम्भुस्थित भलिबल कोर्टमा शुक्रबार सम्पन्न फाइनल खेलमा नेपाल एपीएफ क्लबले हंगवान्जि न्यू डाईमण्ड एकेडेमीलाई २५–१२, २५–११ र २५–११ को सोझो सेटमा पराजित गरी उपाधि हात पार्न सफल भएको हो ।
यसैगरी प्रतियोगितामा नेपाल पुलिस क्लवले त्रिभुवन आर्मी क्लवलाई २५–१८, १७–२५, १३–२५, २५–२३ र १५–१३ गरी ३–२ को सेटले पराजित गरी तेस्र्रो स्थान हासिल गरेको छ ।
प्रतियोगितामा प्रथम हुने टिमले दुई लाख ५० हजार रुपैयाँ तथा दोस्रो हुने टिमले एक लाख २५ हजार रुपैयाँ र तेस्रो स्थान हासिल गर्ने टिमले ५० हजार रुपैयाँ प्राप्त गरेका छन् ।
सो प्रतियोगितामा नेपाल एपीएफ क्लवकी नेविका चौधरी उत्कृष्ट स्पाइकर, हंगवान्जि न्यू डाईमण्ड एकेडेमीकी प्रतिभा माली उत्कृष्ट सर्भर, नेपाल एपीएफ क्लवकी मनिषा तामाङ उत्कृष्ट डिफेन्स, नेपाल एपीएफ क्लवकै सरस्वती चौधरी उत्कृष्ट ब्लकर, सोही क्लवकी विनिता बुढाथोकी उत्कृष्ट सेटर, उदयमान खेलाडीतर्फ नेपाल एपीएफ क्लवकी पुजा चौधरी र नेपाल एपीएफ क्लवका ज्ञानेन्द्र विष्ट उत्कृष्ट प्रशिक्षक भएका छन् । उनीहरुले जनही ५÷५ हजार रुपैयाँ पुरस्कार प्राप्त गरेका छन् ।
चार लाख ५५ हजार रुपैयाँ कूल पुरस्कार राशी रहेको सो प्रतियोगिता लिगकम नकआउटको आधारमा संचालन भएको थियो । प्रतियोगितामा आयोजक नेपाल एपीएफ क्लवसहित त्रिभुवन आर्मी क्लव, नेपाल पुलिस क्लव, हंगवान्जि न्यू डाईमण्ड एकेडेमी, जावलाखेल भलिबल प्रशिक्षण केन्द्र र ढोरपाटन ट्रेनिंग सेन्टर गरी कूल ६ वटा महिला भलिबल टिमको सहभागिता रहेको थियो ।
यसैगरी सात लाख १० हजार रुपैयाँ कूल पुरस्कार राशी रहेको व्याडमिन्टन प्रतियोगितामा नौ वटा इभेन्ट्स तथा पाँच लाख ९५ हजार रुपैयाँ कूल पुरस्कार राशी रहेको लनटेनिस प्रतियोगितामा १३ वटा इभेन्ट्सका खेलहरु संचालन भएको थियो ।
व्याडमिन्टनतर्फ पुरुष एकलमा प्रथम हुनेले ६० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २५ हजार रुपैयाँ तथा क्वाटरफाइनलमा पुग्ने प्रत्येकले ५ हजार रुपैयाँ प्राप्त गरेका छन् भने महिला एकलमा प्रथम हुनेले ५० हजार रुपैयाँ, दोस्रो हुनेले २५ हजार रुपैयाँ र तेस्रो हुनेले साँढे १२ हजार रुपैयाँका दरले पुरस्कार प्राप्त गरेका छन् त्यसैगरी पुरुष युगलमा प्रथम पुरस्कार ६० हजार रुपैयाँ, द्वितिय पुरस्कार ३० हजार रुपैयाँ र तेस्रो हुनेले साँढे १२ हजार रुपैयाँका दरले पुरस्कार प्राप्त गरेका छन् ।
यसैगरी महिला युगलतर्फ प्रथम हुनेले ४० हजार रुपैयाँ, द्वितिय हुनेले २५ हजार रुपैयाँ र तेस्रो हुनेले साँढे १२ हजार रुपैयाँका दरले पुरस्कार प्राप्त गरेका छन् ।
यसैगरी लनटेनिसतर्फ पुरुष एकलमा प्र्रथम हुनेले ६० हजार रुपैयाँ, दोस्रो हुनेले ३० हजार रुपैयाँ, तेस्रो हुनेले १०/१० हजार रुपैयाँ र क्वाटरफाइनमा पुग्ने प्रत्येकले ५ हजार रुपैयाँका दरले पुरस्कार प्राप्त गरेका छन् त्यसैगरी महिला एकलमा प्रथम हुनेले ६० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले १० हजार रुपैयाँका दरले पुरस्कार प्राप्त गरेका छन् ।
लनटेनिसतर्फकै पुरुष युगलमा प्रथम हुनेले ४० हजार रुपैयाँ, द्वितिय हुनेले २० हजार रुपैयाँ र तृतीय हुनेले १०/१० हजार रुपैयाँ प्राप्त गरेका छन् भने महिला युगलतर्फ प्रथम हुनेले ४० हजार रुपैयाँ, द्वितिय हुनेले २० हजार रुपैयाँ र तृतीय हुनेले १०/१० हजार रुपैयाँ पुरस्कार प्राप्त गरेका छन् ।
प्रतियोगिताका खेलहरु सशस्त्र प्रहरी बल, नेपाल प्रधान कार्यालय हल्चोक स्वयम्भुस्थित एपीएफ क्लब हल, लनटेनिस कोर्ट, भलिबल कोर्ट र दशरथ रंगशालास्थित लनटेनिस कोर्टमा संचालन भएका थिए ।
2075-12-15
