सशस्त्र प्रहरी बल नेपालले भाद्र १० गते रसुवाको भोटेकोशी नदीमा आएको बाढी प्रभावित क्षेत्रका ४ हजार ५ सय भन्दा बढी नागरिकको स्वास्थ्य उपचार गरेकोे छ । बाढी प्रभावित क्षेत्रहरुमा भाद्र १० गतेदेखि हेल्थ क्याम्प खडा गरी स्वास्थ्य उपचार सेवा प्रदान गर्दै आइरहेको हो । नेपाल एपीएफ अस्पताल बलम्बुबाट खटिएको दक्ष चिकित्सकसहितको टोलीले बाढी प्रभावित क्षेत्रको विभिन्न ठाउँमा हेल्थ क्याम्प खडा गर्नुकासाथै कारागार तथा होल्डिङ सेन्टरमा रहेकाहरुको स्वास्थ्य उपचार गरेको हो । सो अस्पतालबाट विशेषज्ञ चिकित्सकसहितको स्वास्थ्यकर्मी टोलीले रसुवाको जिल्ला अस्पताल धुन्चे र टिमुरे, नुवाकोटको आयुर्वेद चिकित्सालय, व्रिmयापुत्री भवन, केन्द्रीय कारागार नुवाकोट, सेतीदेवी आधारभूत विद्यालय, क्षेत्रपाल आधारभूत विद्यालय, रणभुवनेश्वरी माध्यमिक विद्यालय, नुवाकोट स्वास्थ्य चौकी लगायतका ठाउँहरुमा हेल्थ क्याम्प सञ्चालन गरेको छ । त्यसैगरी धादिङको गल्छी र काठमाडौको त्रिभुवन अन्तर्राष्ट्रिय विमानस्थलमा समेत हेल्थ क्याम्प खडा गरी सेवा प्रदान गर्दै आईरहेको हो । नुवाकोटस्थित केन्द्रीय कारागार भित्र फैलनसक्ने सम्भावित सरुवा रोग तथा स्वास्थ्य समस्यालाई ध्यानमा राखी सशस्त्र प्रहरी बल नेपालको चिकित्सकसहितको टोलीले विशेष स्वास्थ्य परीक्षण गरेको छ । उक्त कारागारमा भाद्र १७ गते १ सय ८५ जना र २४ गते २ सय १७ जना गरी ४ सय २ जना कैदीबन्दीहरुको स्वास्थ्य परिक्षण तथा स्वास्थ्य सम्बन्धी आवश्यक परामर्श समेत प्रदान गरेको हो । सशस्त्र प्रहरी बल नेपालको चिकित्सकसहितको स्वास्थ्यकर्मीको टोलीले विरामीको उपचारमा मात्र सीमित नरही वातावरणीय स्वच्छता कायम तथा विपद् पश्चात् फैलन सक्ने महामारी नियन्त्रणको लागि नुवाकोटको देवीघाट बजार क्षेत्र, देवीघाट माध्यमिक विद्यालय परिसर र केन्द्रीय कारागार नुवाकोट क्षेत्रमा किटनाशक औषधी छरेको छ । त्यसैगरी नुवाकोटस्थित क्रियापुत्री भवन क्षेत्रमा समेत सरसफाई गरेको छ । नेपाल एपीएफ अस्पतालबाट दक्ष चिकित्सकसहित खटिएको टोलीले बाढी प्रभावित क्षेत्रमा स्वास्थ्य शिविरमार्फत बालबालिका, वृद्धवृद्धा तथा कैदीबन्दी लगायतलाई स्वास्थ्य उपचार सेवा निरन्तर रुपमा प्रदान गर्दै आईरहेको छ । सशस्त्र प्रहरीले बाढी प्रभावित क्षेत्रमा घाइते भएकाहरुको उद्धार र सहयोगका लागि मास क्याजुअल्टी भेहिकल समेत परिचालन गर्नुकासाथै बाढीमा परी घाइते भएकाहरूको उपचारको व्यवस्था मिलाउन नेपाल एपीएफ अस्पताल र विपद् व्यवस्थापन तालिम शिक्षालय कुरिनटारमा रहेको ट्रमा सेन्टर समेत सञ्चालन तथा तयारी अवस्थामा राखेको छ ।
