सशस्त्र प्रहरी महानिरीक्षक नारायण दत्त पौडेलले रसुवाको भोटेकोशी नदीमा आएको बाढी प्रभावित क्षेत्रको स्थलगत अनुगमन गर्नुभई खोज, उद्धार तथा राहत कार्यको बस्तुस्थिती बारे जानकारी लिनुभएको छ । सोही क्रममा उहाँले माननीय गृहमन्त्री सुधन गुरुङसँग बाढी प्रभावित क्षेत्रमा सञ्चालित थप कार्ययोजनाको बारेमा समेत छलफल गर्नुभएको थियो । सशस्त्र प्रहरी महानिरीक्षक पौडेल बाढी प्रभावित क्षेत्रमा भइरहेको खोज तथा उद्धार कार्यको वास्तविक अवस्था, परिचालन र व्यवस्थापनको वस्तुस्थिती बुझ्न नं. १९ गुल्म नुवाकोट पुग्नुभई सशस्त्र प्रहरी कर्मचारीहरुलाई विपद्मा परेका नागरिकहरुको सेवा, सुरक्षा र उद्धारमा कुनैपनि कसर बाँकी नराखी कार्य गर्न निर्देशन दिनुभएको छ । सोही अवसरमा उहाँले बाढी प्रभावित क्षेत्रमा खटिनु भएका नं. ३ गढिमाई वाहिनी मुख्यालय मकवानपुरका वाहिनीपति सशस्त्र प्रहरी नायव महानिरीक्षक किरण बस्नेतबाट सशस्त्र प्रहरी बल नेपालको परिचालन, स्रोत साधनको व्यवस्थापन तथा विशेषज्ञ टोलीबाट भईरहेको खोज तथा उद्धार कार्यको बारेमा जानकारी लिनुभएको थियो । त्यसैगरी महानिरीक्षक पौडेलले नुवाकोट जिल्लाको विदुर नगरपालिका–४ स्थित पृथ्वी माध्यमिक विद्यालयमा स्थापना गरिएको सशस्त्र प्रहरी बल नेपालको हेल्थ क्याम्प तथा सोही नगरपालिका–५ देवीघाटस्थित आयुर्वेदिक स्वास्थ्य केन्द्रमा रहेको होल्डिङ सेन्टरको समेत अवलोकन गर्नुभई सशस्त्र प्रहरी कर्मचारीहरुलाई स्वास्थ्य सेवा तथा व्यवस्थापनमा प्रभावकारी कार्य गर्न हौसला प्रदान गर्नुभयो । साथै उक्त क्षेत्रमा सशस्त्र प्रहरी बल नेपालको विशेषज्ञ टोलीबाट भईरहेको कामकारवाहीको बारेमा जानकारी लिनुकासाथै डग स्नीफिङ तथा उद्धार टोलीले गरेको कार्यको समेत स्थलगत अनुगमन गर्नुभई सो क्षेत्रमा खटिएका सशस्त्र प्रहरी कर्मचारीहरुलाई उच्च मनोवलकासाथ कार्य गर्न निर्देशन दिनुभयो । बाढी प्रभावित क्षेत्रमा सशस्त्र प्रहरी महानिरीक्षक पौडेलले सो क्षेत्रका स्थानिय वासिन्दाहरुसँग छलफल गरी त्यस ठाउँको वस्तुस्थितीबारे जानकारी लिनुकासाथै विपद्को कठिन घडीमा पूर्ण सामार्थ्यकासाथ खोज, उद्धार र राहत कार्यलाई निरन्तरता दिईरहने समेत बताउनुभयो ।
