काठमाडौं,
कैलाली जिल्लाको धनगढी उपमहानगरपालिका २ स्थित भन्सार रोड ईलाकाबाट साउन
२६ गते एपीएफ टोलीले करीब चार लाख ७१ हजार रुपैयाँ बराबरको चोरीपैठारीको
मोबाईल सेट बरामद गरेको छ ।
भारतबाट भन्सार छली अवैध रुपले नेपालतर्फ ल्याउँदै गरेको उल्लेखित
मूल्य बराबरको विभिन्न कम्पनीका २७ थान मोबाईल सेट सशस्त्र प्रहरी बल,
नेपाल नम्बर ५३ गुल्म कैलालीबाट खटिएको एपीएफ टोलीले बरामद गरेको हो ।
बरामद मोबाईल सेट स्थानीय भन्सार कार्यालयमा बुझाइएको छ ।
यसैगरी झापा जिल्लाको मेचीनगर नगरपालिका ५ नकलबन्द स्थित सीमा ईलाकाबाट
साउन २७ गते एपीएफ टोलीले करीब तीन लाख ९३ हजार रुपैयाँ बराबरको
चोरीपैठारी निकासीको सामान बरामद गरेको छ ।
सो ठाउँ स्थित बाँसघारीमा लुकाई छिपाई राखेको अवस्थामा उक्त सामान
सशस्त्र प्रहरी बल, नेपाल फरवार्ड सुरक्षा बेस नकलबन्दबाट खटिएको एपीएफ
टोलीले बरामद गरेको हो । त्यसवेला एपीएफ टोलीले दश बोरा सुपारी, पाँच
कार्टुन चुरोट र एक कार्टुन औषधी बरामद गरेको हो ।
बरामद सामान स्थानीय भन्सार कार्यालयमा बुझाइएको छ ।
यसैगरी धनुषा जिल्लाको शहिद नगरपालिका ४ सीमराढीबाट साउन २७ गते एपीएफ
टोलीले करीव एक लाख ७१ हजार रुपैयाँ बराबरको चोरीपैठारीको स्टेशनरी सामान
बरामद गरेको छ ।
चार वटा मोटरसाईकलमा राखी भारतबाट अवैध रुपले भन्सार छली नेपालतर्फ
ल्याउँदै गरेको उक्त सामान सशस्त्र प्रहरी बल, नेपाल नम्बर ८ गण धनुषाबाट
खटिएको एपीएफ टोलीले बरामद गरेको हो । त्यसवेला एपीएफ टोलीले उक्त सामान
ल्याउन प्रयोग भएको चार वटै मोटरसाईकल समेत बरामद गरेको छ ।
बरामद सामान तथा मोटरसाईकल भन्सार कार्यालय जनकपुरमा बुझाईएको छ । बरामद
मोटरसाईकलको भन्सार दाखिला मुल्य तीन लाख ६० हजार रुपैयाँ रहेको छ ।
