काठमाडौं, राष्ट्रिय सशस्त्र प्रहरी बल नेपाल प्रशिक्षण प्रतिष्ठान मातातिर्थमा सि.सं. २० गुल्मपति तथा स्टाफ तालिम (सीसीएससी) र सि.सं. १ प्रशासनिक व्यवस्थापन तालिम संचालन भएको छ । सशस्त्र प्रहरी महानिरीक्षक शैलेन्द्र खनालले जेठ १४ गते सोही प्रतिष्ठानमा आयोजित एक समारोहका बीच उक्त दुवै तालिमको सयुंक्त रुपमा उद्घाटन गर्नुभयो । सशस्त्र प्रहरी महानिरीक्षक खनालले त्यसअवसरमा सशस्त्र प्रहरी कर्मचारीको व्यावसायिक क्षमता अभिवृद्धिका लागि पेशागत तालिम अपरिहार्य रहेको चर्चा गनुहँुदै यस्ता तालिमले सशस्त्र प्रहरी कर्मचारीहरुलाई चुस्त, दुरुस्त र दक्ष बनाउनुका साथै उनीहरुको वृत्तिविकासमा समेत महत्वपूर्ण भूमिका खेल्ने उल्लेख गर्नुभयो । उहाँले कुनैपनि संगठनको दक्षता र प्रभावकारिता त्यस संगठनमा कार्यरत मानव संसाधनको सीप र क्षमतामा निर्भर हुने चर्चा गर्नुहुँदै कार्यक्षेत्रमा आईपर्ने सुरक्षा चुनौतीहरुको सामना गर्न तालिमको विशेष महत्व रहने उल्लेख गर्नुभयो । सशस्त्र प्रहरी महानिरीक्षक खनालले तालिम प्राप्त जनशक्तिले कूशल नेतृत्व र प्रशासनिक व्यवस्थापनमा प्रभावकारी रुपमा कार्यसम्पादन गर्नसक्ने विश्वास व्यक्त गर्नुहुँदै प्रशिक्षार्थीहरुले तालिमलाई संगठनले दिएको अवसरको रुपमा लिएर बढि भन्दा बढि ज्ञान आर्जन गर्न अनुशासित एवं लगनशिल भई लाग्नुपर्ने बताउनुभयो । प्रविधिको विकास सँगै राष्ट्रिय तथा स्थानीय स्तरमा हुन सक्ने सुरक्षा चुनौतीहरुलाई आँकलन गरी त्यस्ता चुनौतीहरुलाई परास्त गर्नसक्ने क्षमतावान अधिकृत उत्पादनमा यस्ता व्यावसायिक तालिम कोशेढुंगा सावित हुने विश्वास व्यक्त गर्नुभयो । कार्यक्रममा सो प्रतिष्ठानका कार्यकारी निर्देशक सशस्त्र प्रहरी अतिरिक्त महानिरीक्षक रामशरण पौडेलले स्वागत मन्तव्यको क्रममा राज्यले सुम्पिएको जिम्मेवारीहरुलाई सफलता पूर्वक सम्पन्न गर्नसक्ने कूशल अधिकृत उत्पादन गर्ने उद्देश्यका साथ सो प्रतिष्ठानले विभिन्न व्यावसायिक तालिमहरु संचालन गर्दै आइरहेको उल्लेख गर्नुभयो । उहाँले संगठनको नीति अनुरुप व्यावसायिक तालिमहरु समयानुकुल, प्रभावकारी एवं वैज्ञानिक ढंगबाट संचालन गरिने प्रतिवद्वता व्यक्त गर्नुभयो । बाह्र हप्ता अवधिको गुल्मपति तथा स्टाफ तालिममा सशस्त्र प्रहरी नायव उपरीक्षक ३ जना तथा सशस्त्र प्रहरी निरीक्षक २७ जना र राष्ट्रिय अनुसन्धान विभागका एक जना अधिकृत गरी कुल ३१ जना प्रशिक्षार्थीहरु सहभागि रहेका छन् । यसैगरी चार हप्ता अवधिको प्रशासनिक व्यवस्थापन तालिममा २० जना सशस्त्र प्रहरी निरीक्षकहरुको सहभागिता रहेको छ । कार्यक्रममा सशस्त्र प्रहरी अतिरिक्त महानिरीक्षकहरु पुष्पराम के.सी., नारायणबावु थापा, रामशरण पौडेल, सुबोधकुमार अधिकारी, निराकारम बिक्रम शाह, खडानन्द चौधरी र राजेश श्रेष्ठ लगायत सशस्त्र प्रहरी बल नेपालका बरिष्ठ अधिकृतहरुको उपस्थिति रहेको थियो ।
2075-2-14
