समाचार

सर्लाही जिल्लाको कविलासी नगरपालिका ८ अगर्वाबाट चैत्र २२ गते सशस्त्र प्रहरीले श्रोत नखुलेको ५ लाख भारतीय र ५ लाख नेपाली रुपैयाँसहित तीन जनालाई नियन्त्रणमा लिएको छ । नम्बर १० गण सर्लाहीले उल्लेखित रुपैयाँसहित सोही जिल्लाको धनकौल गाँउपालिका ६ घर भई हाल हरिवन नगरपालिका ११ बस्ने ४५ बर्षिय गान्धि साह सोनार, रुपन्देही जिल्लाको साविक फरेना गाविस ६ बस्ने ३५ बर्षिय राजेश बनिया र भारत घर भई हाल पर्सा जिल्लाको बिरगंज महानगरपालिका १९ बस्ने १९ बर्षिय अनिल साहलाई नियन्त्रणमा लिएको हो । विशेष सूचनाको आधारमा खटिएको सशस्त्र प्रहरीले मलंगवाबाट नवलपुरतर्फ जाँदै गरेको तीन जना सवार प्रदेश नं. २-०३-०१५ प ५९६९ नम्बरको मोटरसाइकल रोकी जाँच गर्दा उनीहरुको साथमा उक्त रुपैयाँ फेला परेको र सो रुपैयाँको श्रोत खुलाउन नसकेपछि नियन्त्रणमा लिइएको हो । उनीहरुको साथबाट भारतीय रुपैयाँ ५ सय दरको ९ सय ९६ वटा (४ लाख ९८ हजार), २ हजार दरको एक वटा र नेपाली रुपैयाँ ५० दरको ३२ वटा (१ हजार ६ सय), १ सय दरको ४ सय ८४ वटा (४८ हजार ४ सय), ५ सय दरको ३ सय वटा (१ लाख ५० हजार), १ हजार दरको ३ सय वटा (३ लाख) नोट बरामद भएको हो । नियन्त्रणमा लिएका तीनै जनालाई बरामद रुपैयाँसहित आवश्यक कारवाहीको लागि राजश्व अनुसन्धान कार्यालय पथलैया बारामा बुझाईएको छ ।

माननीय उप-प्रधान एवं गृहमन्त्री नारायणकाजी श्रेष्ठले मंगलबार प्रधान कार्यालयको निरीक्षण भ्रमणका साथै बरिष्ठ अधिकृत छलफल तथा निर्देशन कार्यक्रमको समापन गर्नुभई सकल दर्जाका सशस्त्र प्रहरी कर्मचारीहरुलाई निर्देशन दिनुभएको छ । माननीय उप-प्रधान एवं गृहमन्त्री श्रेष्ठले सशस्त्र प्रहरी बल नेपालको पृष्ठभूमि, संगठनात्मक संरचना, काम कर्तव्य र जिम्मेवारी अन्तर्गतका विषयहरुमा शान्ति सुरक्षा, सीमा सुरक्षा, विपद् व्यवस्थापन, दंगा नियन्त्रण, सार्वजनिक सम्पत्तीको संरक्षण, तथा कानूनको कार्यान्वयन गर्ने क्रममा सम्पादन गरिएका समग्र गतिविधिहरु समेटेर गरिएको प्रस्तुतीकरणले संगठनको बारेमा थप प्रष्ट भएको बताउनुभयो । उहाँले शान्ति, सुरक्षा, प्रतिबद्धताको मुल मन्त्रलाई आत्मसात गरी नागरिकको जिउधनको सुरक्षा, सीमा सुरक्षा, राजश्व सुरक्षा, औद्योगिक सुरक्षा कायम गर्न अहोरात्र खटिएर सेवा प्रदान गर्ने कार्य सराहनीय रहेको बताउनुहुँदै राज्यले सुम्पिएका जिम्मेवारीहरु साथसाथै सशस्त्र प्रहरी बलले भैपरि आउने विषम परिस्थितिहरुमा समेत आफ्नो क्षमता, व्यावसायिकता र उच्च पेशागत दक्षता प्रदर्शन गरी राज्यको अब्बल सुरक्षा निकायको रुपमा आफ्नो पहिचान स्थापित गर्न सफल रहेको समेत बताउनुभयो । उहाँले प्रधान कार्यालयमा देशभरमा कार्यरत वरिष्ठ अधिकृतहरु भेला भई संगठनलाई कसरी गतिशिल र सक्षम बनाउन सकिन्छ भनि छलफल गर्न गोष्ठी आयोजना गर्ने कार्य प्रशंसनिय रहेको बताउनुहुँदै स्वच्छ, निष्पक्ष र छिटोछरितो सेवा प्रवाहमार्फत मुलुकको सुरक्षा व्यवस्थालाई प्रभावकारी बनाउन अझ मिहेनतका साथ कार्यसम्पादन गरी भ्रष्टाचार र आर्थिक अनुशासनका सवालमा कुनै पनि सम्झौता नगरी निर्मम रुपमा प्रस्तुत हुन समेत निर्देशन दिनुभयो । उप-प्रधान एवं गृहमन्त्री श्रेष्ठले सशस्त्र प्रहरी बल, नेपालसंग सम्बन्धित कानूनी विषयहरु (ऐन, नियमावली, कार्यविधि, मापदण्ड) लाई बदलिदो परिवेशमा समसामयिक परिमार्जन, पुनरावलोकन गर्ने र आवश्यकता अनुसार नयाँ कानुन तर्जुमा गर्नुपर्ने बताउनुहुँदै संगठनलाई नेपाल सरकारले तोकेको जिम्मेवारी अनुरुपको कार्य प्रभावकारी ढंगले सम्पादन गर्नका लागि मौजुदा दरबन्दी संरचनाको पुनर्संरचना गर्ने गरी संगठन तथा व्यवस्थापन गर्ने कार्यलाई अगाडी बढाउन गृहमन्त्रालयको आवश्यक पहलकदमीमा कुनै कमी नहुने बताउनुभयो । उहाँले सशस्त्र प्रहरीले न्यून सेवा सुविधा र अपर्याप्त स्रोत साधनका बाबजुद कतिपय ठाउँमा भाडाको घर, अस्थाई संरचनामा बसेर, कतिपय ठाउँमा जीर्ण अवस्थाका आवास तथा भवनहरुबाट नागरिकलाई सेवा र सीमाको सुरक्षा गरिरहेको अवस्था विद्यमान रहेको हुँदा यस्ता समस्याहरु समाधान गरी भौतिक पूर्वाधार निर्माण र संगठनको क्षमता बढाउने विषयमा गृहमन्त्रालयको तर्फबाट आवश्यक सहयोग रहने बताउनुभयो । सशस्त्र प्रहरी बल नेपाललाई सीमाको डेडिकेटेड फोर्स बनाउन अन्तर्राष्ट्रिय मापदण्ड सहितको थप बिओपीहरुको स्थापना, मौजूदा बिओपीहरुको स्तरवृद्धि गर्दै समग्र संगठनलाई नै प्रविधिमैत्री एवं चलायमान बनाउनु पर्ने उल्लेख गर्नुहुँदै हिमाली क्षेत्रमा खटिने सुरक्षाकर्मीको लागि मापदण्ड अनुसारको पोशाक, सशस्त्र प्रहरी कर्मचारीलाई उपलब्ध हुने रासनको न्यायोचित वितरण तथा अन्य सेवासुविधामा उचित ध्यान पुर्‍याईने बताउनुभयो । उप-प्रधान एवं गृहमन्त्री श्रेष्ठले विपद् प्रतिकार्य, राहत तथा उद्धारमा सशस्त्र प्रहरी बलले निर्वाह गरेको भूमिका सराहनीय रहेको बताउनुहुँदै विपद् उद्धार केन्द्रहरूको विस्तार, विपद् उद्धार सामाग्रीको नियमित उपलब्धता र विपद् व्यवस्थापनमा संलग्न सशस्त्र प्रहरीको क्षमता विकासका लागि कार्ययोजना बनाई उचित स्रोतसाधनको प्रबन्धसहित ठोस कार्य गर्नका लागि मन्त्रालय सदैव सकारात्मक रहेको बताउनुभयो । कार्यक्रममा धन्यवाद ज्ञापन गर्नुहुँदै सशस्त्र प्रहरी महानिरीक्षक राजु अर्यालले सुरक्षा आफैमा जटिल, संवेदनशिल र चुनौतीपूर्ण विषय भएको बताउनुहुँदै अन्य सुरक्षा निकायहरुसँग निकट समन्वयका साथ राज्य प्रदत्त कार्यादेशहरुलाई कुशलतापूर्वक बहन गर्दै नेपाल सरकार तथा मजकुर गृह मन्त्रालयका नीति, कार्यक्रम, आदेश, निर्देशनहरुलाई अक्षरशः पालना गरी ईमान्दारिताकासाथ परिचालन भईरहेको बताउनुभयो । उहाँले प्रशासन मायाले होईन न्यायले चल्दछ, भन्ने मान्यतालाई अंगिकार गर्दै आन्तरिक प्रशासनलाई प्रणालीगत, निश्चित पद्दतीमा संगठन चल्ने अवस्था सिर्जना गर्नका लागि पारदर्शीता र जवाफदेहीता सहितको पूर्वानुमानयोग्य सरुवा, बढुवा, कमाण्ड, तालिम, यू.एन. मिशन तथा कल्याणकारी कार्यक्रम एवं अवसरहरुलाई न्यायसंगत रुपमा वितरणको प्रक्रिया थालनी गरिएको बताउनुभयो । महानिरीक्षक अर्यालले कर्मचारीहरुमा थप हौसला बृद्धिका लागि पश्चिमी अफ्रिकी मुलुक माली स्थित संयुक्त राष्ट्रसंघीय मिसनमा १ सय ४० जनाको फर्म्ड पुलिस युनिट (एफपीयु) परिचालन गर्ने तयारी अन्तिम चरणमा पुगिसकेको बताउनुभयो । उहाँले राज्यको मेरुदण्डको रुपमा रहेको राजस्व एवं भन्सार वृद्धि गर्ने कार्यमा सरोकारवालाहरु सबैको रचनात्मक सहयोग अपरिहार्य रहेको उल्लेख गर्नुहुँदै सम्बन्धित सबै निकायहरुसँग आवश्यक सहयोग, समन्वयन र सहकार्यका साथ अगाडी बढिरहेको बताउनुभयो । महानिरीक्षक अर्यालले प्रधान कार्यालयमा आयोजित बरिष्ठ अधिकृत छलफलले संगठन सुधारका योजना र कार्यक्षेत्रमा व्याप्त कठिनाई र समस्याहरुका बारेमा समेत निचोड निकाल्न सफल भएको बताउनुहुँदै विशेषत सीमा सुरक्षा, राजस्व संकलन, जनशक्ति तथा स्रोतसाधनका साथै सरुवा, बढुवा लगायतका वृत्ति बिकासका विषयलाई ऐन, नियमावलीले सम्बोधन गर्ने गरी मजकूर मन्त्रालयमा पेश गरिने हुँदा सकारात्मक साथ र सहयोगको अपेक्षा गर्नुभयो । निरीक्षण भ्रमणका क्रममा माननीय उप-प्रधान एवं गृहमन्त्री नारायणकाजी श्रेष्ठले प्रधान कार्यालय स्थित केन्द्रिय समन्वय सेल, संग्राहलय, अनुगमन तथा गुनासो व्यवस्थापन इकाई र सशस्त्र प्रहरी बल नेपालले प्रयोगमा ल्याएको विपद् उद्धार सामाग्रीहरुको अवलोकन गरि सो सम्बन्धि जानकारी लिनुको साथै उद्वारका विषयमा समेत जानकारी लिनुभएको थियो । सोही क्रममा सशस्त्र प्रहरी बरिष्ठ उपरीक्षक विष्णु प्रसाद भट्टले संगठनको विषयवस्तु सम्बन्धि प्रस्तुतीकरण गर्नुभएको थियो । कार्यक्रम देशभरका इकाईहरुमा ‘लाइभ भिडियो स्ट्रीमिङ’, इन्ट्रानेट तथा सशस्त्र प्रहरी संचारद्वारा प्रत्यक्ष प्रसारण गरि हेर्ने र सुन्ने ब्यवस्था मिलाईएको थियो । कार्यक्रममा श्रीमान् गृहसचिव विनोद प्रकाश सिंह, सशस्त्र प्रहरी अतिरिक्त महानिरीक्षकहरु नारायणदत्त पौडेल, चन्द्र प्रकाश गौतम, बंशीराज दाहाल, गृहमन्त्रालयका सह-सचिव तथा प्रवक्ता, सशस्त्र प्रहरी नायव महानिरीक्षकहरु, गृहमन्त्रालयका पदाधिकारी, तालिम शिक्षालयका समादेशकहरु लगायत सशस्त्र प्रहरी बल नेपालका अधिकृत तथा विल्लादार जवानहरुको उपस्थिती रहेको थियो ।

रुपन्देही जिल्लाको सिद्धार्थनगर नगरपालिका १ डण्डा सीमा ईलाकाबाट चैत्र २१ गते करीव १ लाख ३ हजार रुपैयाँ बराबरको चोरीपैठारीको विभिन्न सामान बरामद भएको छ । भारतबाट अवैध रुपले ल्याउँदै गरेको उल्लेखित मुल्य बराबरको लत्ताकपडा, मोबिल र डोर लक प्रस्तावित सीमा सुरक्षा गुल्म डण्डा (बिओपी डण्डा) ले बरामद गरेको हो । बरामद सामान भैरहवा भन्सार कार्यालय बेलहिया रुपन्देहीमा बुझाईएको छ ।

सप्तरी जिल्लाको डाक्नेश्वरी नगरपालिका ४ स्थित कुशाहा सीमा ईलाकाबाट चैत्र २१ गते करीव २ लाख २२ हजार रुपैयाँ बराबरको चोरीपैठारी तथा निकासीको सामान र दुई वटा मोटरसाईकल नियन्त्रणमा लिइएको छ । उक्त मोटरसाईकलमा राखी भारतबाट अवैध रुपले नेपालतर्फ ल्याउदै गरेको लत्ताकपडा तथा चिनी र भारततर्फ लैजादै गरेको मदिरा प्रस्तावित सीमा सुरक्षा गुल्म पातो (बिओपी पातो) ले नियन्त्रणमा लिएको हो । बरामद सामान तथा मोटरसाईकल आवश्यक कारवाहीको लागि राजविराज भन्सार कार्यालयमा बेल्ही तिलाठीमा बुझाईएको छ ।

मकवानपुर जिल्लाको हेटौडा उपमहानगरपालिका १५ स्थित चुरियामाई मन्दिर ईलाकाबाट चैत्र २० गते करीव १६ लाख रुपैयाँ बराबरको सामानसहित पिकअप गाडी नियन्त्रणमा लिइएको छ । बाग्मती प्रदेश ०१-०२५च ५२३० नम्बरको गाडीमा राखेर ल्याउँदै गरेको ४३ बोरा स्पेशल मिल्क पाउडर र ५५ वटा खाली क्यारेट नम्बर १४ गण मकवानपुरले नियन्त्रणमा लिएको हो । साथै उक्त गणले सोही स्थानबाट करीव ४ लाख ८३ हजार रुपैयाँ बराबरको मोवाईल कभर, टेम्पर ग्लास लगायतका सामान नियन्त्रणमा लिएको हो । बरामद सामान तथा गाडी आवश्यक कारवाहीको लागि बिरगंज भन्सार कार्यालय पर्सामा बुझाईएको छ ।

सप्तरी जिल्लाको राजगढ नगरपालिका १ कजराटोल सीमा ईलाकाबाट चैत्र १८ गते करीव १ लाख रुपैयाँ बराबरको पशुचौपाया बरामद भएको छ । नेपालबाट अवैध रुपले भारततफै लैजादै गरेको उक्त चौपाया प्रस्तावित सीमा सुरक्षा गुल्म पातो (बिओपी पातो)ले बरामद गरेको हो । बरामद चौपाया राजविराज भन्सार कार्यालय बेल्ही तिलाठीमा बुझाईएको छ ।

रुपन्देही जिल्लाको सिद्धार्थनगर नगरपालिका १ डण्डा ईलाकाबाट चैत्र १९ गते करीव २ लाख ८ हजार रुपैयाँ बराबरको चोरीपैठारीको लत्ताकपडा तथा किराना सामान बरामद भएको छ । भारतबाट अवैध रुपले नेपालतर्फ ल्याउँदै गरेको उक्त सामान प्रस्तावित सीमा सुरक्षा गुल्म डण्डाले बरामद गरेको हो । यसैगरी कपिलवस्तु जिल्लाको कृष्णनगर नगरपालिका ५ डाबर यशोधरा गाउँपालिका ६ रंगपुरबाट चैत्र १९ गते करीव १ लाख ७२ हजार रुपैयाँ बराबरको चोरीपैठारीको लत्ताकपडा बरामद भएको छ । भारतबाट अवैध रुपले ल्याउँदै गरेको उक्त लत्ताकपडा प्रस्तावित सीमा सुरक्षा गुल्म कृष्णनगर र बिओपी मर्यादापुरले बरामद गरेको हो । बरामद सामान आवश्यक कारवाहीको लागि सम्बन्धित निकायमा बुझाईएको छ ।

सशस्त्र प्रहरी बल नेपाल प्रधान कार्यालय हल्चोक स्वयम्भूमा चैत्र १९ गतेदेखि दुई दिने बरिष्ठ अधिकृत छलफल तथा निर्देशन कार्यक्रम शुरु भएको छ । संगठनको समसामयीक विषयहरु तथा समस्याहरुको बारेमा छलफल गरी वर्तमान तथा भविष्यमा आउन सक्ने चुनौती तथा अवसरहरुको पहिचान गर्दै भावी कार्य दिशाको मार्गनिर्देशन गर्ने उद्देश्यले कार्यक्रम आयोजना गरिएको हो । कार्यक्रमको उद्घाटन गर्नुहुँदै सशस्त्र प्रहरी महानिरीक्षक राजु अर्यालले यस्ता किसिमका कार्यक्रमले संगठनलाई थप गतिशिल बनाउनमा महत्वपूर्ण भूमिका निर्वाह गर्ने बताउनुभयो । उहाँले हजारौँ सदस्यहरु रहेको एउटा सिंगो संगठनलाई कुनै व्यक्ति विशेषले मात्र सुधार गर्न सम्भव नरहेको बताउनुहुँदै म एक जनाले उर्जा दिएर के हुन्छ भन्ने मानसिकताबाट माथि उठी असम्भव के छ, भन्ने मनस्थिती बनाई शान्ति सुरक्षा, तालिम, सीमा, विपद् उद्धार, प्रशासन, बन्दोवस्ती लगायत राज्यले निर्दिष्ट गरेका म्याण्डेटहरुमा परिचालित हुँदा आईपरेका समस्याको पहिचान, सुधारका क्षेत्रहरु, मौजुदा संयन्त्र एवं परिपाटीमा गर्नुपर्ने परिमार्जनमा विश्लेषण तथा गहन अध्ययन र छलफल गरी समाधानको निकास र निचोड निकाल्ने विश्वास व्यक्त गर्नुभयो । दुई दिनसम्म चल्ने कार्यक्रममा प्रधान कार्यालयका बरिष्ठ अधिकृतहरु, प्रशिक्षण प्रतिष्ठानका कार्यकारी निर्देशक, बाहिनीपतिहरु, एपीएफ कमाण्ड तथा स्टाफ कलेजका समादेशक र तालिम शिक्षालयका समादेकहरुकोे उपस्थिती रहने छ ।

रुपन्देही जिल्लाको रोहिणी गाउँपालिका १ चम्कीपुरबाट चैत्र १९ गते करीव १ लाख ३५ हजार रुपैयाँ बराबरको १ सय ८० वटा कुखुरा बरामद भएको छ । भारतबाट अवैध रुपले नेपालतर्फ ल्याउँदै गरेको उक्त कुखुरा बिओपी बुचीले बरामद गरेको हो । बरामद कुखुरा नेपाल प्रहरी, स्थानीय जनप्रतिनिधि, स्थानिय भद्रभलाद्मी र पशु क्वारेनटाइन कार्यालयका कर्मचारीको रोहवरमा नष्ट गरिएको छ ।

नेपाल एपीएफ स्कूल कीर्तिपुरको १८औँ वार्षिकोत्सव कार्यक्रम सम्पन्न भएको छ । प्रमुख अतिथि सशस्त्र प्रहरी महानिरीक्षक राजु अर्यालले वार्षिकोत्सवको अवसरमा संचालन गरिएका विभिन्न प्रतियोगितामा सहभागि छात्रछात्राहरुलाई प्रमाणपत्र प्रदान गर्नुको साथै हरेक वर्ष प्रकाशन हुँदै आईरहेको विद्यालयको वार्षिक ‘स्मारिका सन्निवेश’को समेत विमोचन गर्नुभएको थियो । महानिरीक्षक अर्यालले शिक्षा आफैमा गहन र बृहत विषय भएकोले समग्र विद्यालयको छवि र स्तर उक्त विद्यालयले आफ्ना विद्यार्थीहरुलाई प्रदान गरेको व्यवहारिक एवं सैद्धान्तिक शिक्षाले विद्यार्थी जीवन निर्वाह पश्चात सम्बन्धित विद्यार्थीहरु के-कस्ता पेशा तथा व्यवसायमा अवलम्बन गर्न सक्षम भएका छन् भन्ने कुरामा निर्भर रहने बताउनुभयो । उहाँले कोभिड-१९को कारण थलिएको नेपाली शैक्षिक अवस्थालाई छोटो समयमै परिवर्तन गरी अगाडी बढाउन सफल भएकोमा विद्यालयका प्रधानाचार्य, शिक्षक, कमाण्डेन्ट, विद्यार्थी, अभिभावक र सहयोगी संघसंस्थाहरुले पु¥याएको सहयोगको मुक्तकण्ठले प्रशंसा गर्नुहुँदै स्थापना दिवसले अभिभावक, शिक्षक र विद्यार्थीहरुमा थप उर्जा र हौसला मिलोस भन्ने शुभकामना व्यक्त गर्नुभयो । उहाँले नेपाल एपीएफ स्कूललाई संगठनले गर्नुपर्ने सहयोग र समन्वयमा कुनै कसुर बाँकी नराख्ने बताउनुहुँदै वर्तमान अवस्थामा नेपाल एपीएफ स्कूलले दिने शिक्षा र अतिरिक्त क्रियाकलापहरुमा छुट्टै पहिचान गराउँदै अगाडी बढाउनुको साथै यस विद्यालयलाई समयानुकुल परिमार्जन र वैज्ञानिक बनाई उत्कृष्ट विद्यालयको रोजाई भित्र पार्ने वातावरण सिर्जना गर्न विद्यालय परिवारलाई निर्देशन दिनुभयो । वार्षिकोत्सवको अवसर पारी आफ्ना सन्ततीहरुको भविष्य नेपाल एपीएफ स्कूलको जिम्मामा सुम्पनहुने सबै अभिभावकप्रति हार्दिक आभार प्रकट गर्नुहुँदै महानिरीक्षक अर्यालले भन्नुभयो-‘यहाँहरुको छनौट र हामीप्रतिको विश्वासमा कुनै सन्देह नगर्नुहोला, हामीले हाम्रा नानीबाबुहरुलाई उचित र समयानुकुल शिक्षा दिने कार्यमा कुनै सम्झौता गर्ने छैनौँ ढुक्क भएर आफ्ना सन्ततीहरुको बारेमा चासो राखी विद्यालयलाई आवश्यक सल्लाह र सुझाव दिनुहुने अपेक्षा राख्दछु ।’ कार्यक्रममा विद्यालय व्यवस्थापन समितिका अध्यक्ष सशस्त्र प्रहरी अतिरिक्त महानिरीक्षक नारायणदत्त पौडेलले विद्यार्थीहरुको अदम्य आट र मिहिनेतको कारण एक सक्षम, विवेकशिल र विशिष्ट व्यक्ति बन्न सफल हुने बिश्वास व्यक्त गर्नुहुँदै विद्याार्थीहरुको संवेगात्मक विषयहरुमा महत्वपूर्ण भूमिका निर्वाह गर्नुहुने शिक्षक, अतिरिक्त क्रियाकलापमा संलग्न प्रशिक्षक वर्ग तथा विद्यालय परिवारप्रति हार्दिक आभार प्रकट गर्नुभयो । उहाँले पूर्व मेचीदेखि पश्चिम महाकालीसम्म छरिएर रहेका सशस्त्र प्रहरी कर्मचारी तथा सर्वसाधारण नागरिकका सन्ततीलाई ज्ञानको ज्योति फैलाउन विद्यालय अग्रसर रहेको बताउनुहुँदै कठिन समय र परिस्थितीमा पनि शैक्षिक क्षेत्रलाई हातेमालो गर्दै अगाडी बढाउन सफल भएकोमा खुशी व्यक्त गर्नुभयो । विद्यालयका प्रधानचार्य युवराज पराजुलीले संगठनले विश्वास गरेर जिम्मेवारी प्रदान गरे अनुरुप नै आफ्नो ज्ञान, सिप, बुद्धि, विवेक र दक्षताले भ्यायसम्म मन वचन र कर्मका साथै विद्यालय तथा विद्यार्थीहरुको समुज्वल भविष्य निर्माण कार्यमा अगाडी बढिरहेको बताउनुहुँदै नेपाल एपीएफ स्कूल किताबी ज्ञानमा मात्र सिमित नभई अतिरिक्त क्रियाकलाप तथा शिक्षात्मक क्रियाकलापमा समेत अग्रसर रहेको बताउनुभयो । उहाँले विद्यार्थीको प्रगति नै शिक्षकको पुरस्कार रहेको कुरा बताउनुहुँदै विद्यालय, बिद्यार्थी र अभिभावकको त्रिकोणात्मक समन्वय र सहकार्य रह्यो भने हरेक सन्तती महान व्यक्ति बन्न कुनै ठूलो कुरा नरहेको बताउनुभयो । वार्षिकोत्सव कार्यक्रममा नेपाल एपीएफ स्कूलका छात्रछात्राहरुले फुटबल, काता, कराते, तेक्वान्दो लगायत कविता वाचन, नाचगान समेत प्रस्तुत गरेको थिए । साथै फुटबल प्रतियोगितामा कक्षा ४ को टिमले कक्षा ५ का विद्यार्थी टिमलाई १-३ गोलका अन्तरले पराजित गरी विजयी भएका थिए । कार्यक्रममा सशस्त्र प्रहरी बल नेपालका अतिरिक्त महानिरीक्षक बंशीराज दाहाल लगायत सशस्त्र प्रहरी बल नेपालका बरिष्ठ अधिकृत, कीर्तिपुर नगरपालिका वडा नम्बर ४ का अध्यक्ष, पूर्व विद्यालयका समादेशक, विद्यालय व्यवस्थापन समितिका सदस्यहरु, संचारकर्मी, शिक्षक÷शिक्षिकाहरु, अभिभावक तथा विद्यालयका छात्रछात्राहरुको समेत उपस्थिती रहेको थियो ।

सशस्त्र प्रहरी बल नेपालको प्रवक्ता तथा सूचना अधिकारीको जिम्मेवारी सशस्त्र प्रहरी बरिष्ठ उपरीक्षक राजेन्द्र खड्कालाई दिईएको छ । यसअघि प्रवक्ता तथा सूचना अधिकारी रहनुभएका सशस्त्र प्रहरी नायव महानिरीक्षक पुरुषोत्तम थापाको सशस्त्र प्रहरी बल नेपाल नम्बर ९ पशुपतिनाथ बाहिनी मुख्यालय काठमाडौंमा सरुवा भए पश्चात बरिष्ठ उपरीक्षक खड्कालाई उक्त जिम्मेवारी दिईएको हो । संगठनसँग सम्बन्धित सूचना तथा जानकारीको लागि उहाँलाई मोबाईल नम्बर ९८५१२७२००७ र ईमेल ठेगाना spokesperson@apf.gov.np मा सम्पर्क गर्न सकिने छ ।

नेपाल प्रशासनिक प्रशिक्षण प्रतिष्ठानमा नेपाल सरकारका नवनियुक्त शाखा अधिकृतहरुको लागि संचालन भएको आधारभूत प्रशासनिक प्रशिक्षणका प्रशिक्षक तथा प्रशिक्षार्थीहरुले चैत्र १६ गते सशस्त्र प्रहरी बल नेपाल प्रधान कार्यालयको स्थलगत अवलोकन भ्रमण गर्नुभएको छ । स्थलगत अवलोकन भ्रमणमा सशस्त्र प्रहरी बरिष्ठ उपरीक्षक राजेन्द्र खड्का र सशस्त्र प्रहरी उपरीक्षक अशोक कुमार बमले प्रशिक्षक तथा प्रशिक्षार्थी अधिकृतहरुलाई सशस्त्र प्रहरी बल नेपालको परिचय, विकासक्रम, संचालन, काम कर्तव्य र अधिकार लगायतका विविध विषयमा प्रस्तुतीकरण गर्नुभएको थियो । प्रशिक्षक तथा प्रशिक्षार्थी अधिकृतहरुले सशस्त्र प्रहरी बल नेपालको सांगठानिक संरचना, कार्यादेश, शान्ति र द्वन्द्वको समयमा सशस्त्र प्रहरी बल नेपालको भूमिका, सीमा सुरक्षा तथा विपद् व्यवस्थापनमा सशस्त्र प्रहरी बल नेपालको परिचालन, आन्तरि क सुरक्षा चुनौतीहरु, सुरक्षा निकाय तथा समकक्षीहरुसँगको समन्वय र सहकार्य लगायतका विषयमा राखेका जिज्ञासाहरुको बारेमा समेत उहाँहरुले प्रष्ट पार्नुभएको थियो । सोही क्रममा प्रशिक्षक तथा प्रशिक्षार्थी अधिकृतहरुलाई सशस्त्र प्रहरी बल नेपालको संग्रहालय र केन्द्रिय आदेश कक्षको अवलोकन भ्रमण समेत गराईएको थियो । सो टोलीमा १ जना प्रशिक्षक तथा २६ जना प्रशिक्षार्थी अधिकृतहरु गरी कुल २७ जनाको सहभागिता रहेको थियो ।

चैत्राष्टमीको अवसरमा सशस्त्र प्रहरी बल नेपाल नम्बर १९ गण हेक्वा (विशेष कार्यदल) बगलामुखी हल्चोक स्वयम्भूमा चैत्र १५ गते सशस्त्र प्रहरी बल नेपालको निशान, कोत तथा मौलो पुजा सम्पन्न भएको छ । बिहान ७ बजेर ३५ मिनेट तथा १० बजेर ४५ मिनेटको पुजाको संकल्प साइतमा गरिएको पुजामा सशस्त्र प्रहरी महानिरीक्षक राजु अर्यालले सशस्त्र प्रहरी बल नेपालको निशानमा पञ्जाछाप लगाउनुभएको थियो । महानिरीक्षक अर्यालबाट सम्पन्न भएको पुजा कार्यक्रममा सशस्त्र प्रहरी अतिरिक्त महानिरीक्षकहरु नारायणदत्त पौडेल, चन्द्र प्रकाश गौतम र बंशीराज दाहाल लगायत सशस्त्र प्रहरी बल नेपालका अधिकृत, विल्लादार तथा जवानहरुको समेत उपस्थित रहेको थियो । सशस्त्र प्रहरी व्याण्डको मंगलधुनबीच सुरु भएको पुजामा सशस्त्र प्रहरी बल नेपालको एक टोलीले निशान भगवती सलामी अर्पण गरेको थियो । महानिरीक्षक अर्यालले पुजा व्यवस्थापनमा उत्कृष्ट कार्यगर्ने सशस्त्र प्रहरी कर्मचारीहरुलाई पगरी तथा नगद पुरस्कार समेत प्रदान गर्नुभएको थियो । सशस्त्र प्रहरी बल नेपालले चैत्राष्टमीको अवसरमा परम्परागत रुपमा हरेक वर्ष निशान, कोत तथा मौलोपुजा गर्दै आएको छ ।

रुपन्देही जिल्लाको सिद्धार्थनगर नगरपालिका १ डण्डा ईलाकाबाट चैत्र १४ गते सशस्त्र प्रहरीले करीव १ लाख ६० हजार रुपैयाँ बराबरको चोरीपैठारीको लत्ताकपडासहित एक जनालाई नियन्त्रणमा लिएको छ । भारतबाट अवैध रुपले नेपालतर्फ ल्याउँदै गरेको उक्त लत्ताकपडासहित सोही जिल्लाको ओमसतिया गाउँपालिका २ पडसरी बस्ने ४० वर्षिया पुजा थापालाई सशस्त्र प्रहरी बल नेपाल बिओपी डण्डाले नियन्त्रणमा लिएको हो । नियन्त्रणमा लिइएका थापालाई बरामद लत्ताकपडासहित आवश्यक कारवाहीको लागि भैरहवा भन्सार कार्यालय बेलहिया रुपन्देहीमा बुझाईएको छ ।

कपिलवस्तु जिल्लाको यशोधरा गाउँपालिका ७ नुनुवाबाट चैत्र १४ गते करीव २ लाख ६७ हजा रुपैयाँ बराबरको ५२ क्विन्टल चामल र साढे ३ क्विन्टल युरिया मल बरामद गरिएको छ । भारतबाट अवैध रुपले ल्याई बेवारिसे अवस्थामा राखेको उक्त चामल तथा मल सशस्त्र प्रहरी बल नेपाल बिओपी मर्यादापुर र सुठौली भन्सार कार्यालयका कर्मचारीले बरामद गरेको हो । बरामद चालम तथा मल सुठौली भन्सार कार्यालय कपिलवस्तुमा बुझाईएको छ ।

रुपन्देही जिल्लाको रोहिणी गाउँपालिका १ वगाहा स्थित सीमा ईलाकाबाट चैत्र १३ गते सशस्त्र प्रहरीले करीव ३ लाख २३ हजार रुपैयाँ बराबरको चोरीपैठारीको लत्ताकपडा बरामद गरेको छ । भारतबाट अवैध रुपले नेपालतर्फ ल्याउँदै गरेको उक्त लत्ताकपडा नम्बर २७ गण रुपन्देहीले बरामद गरेको हो । बरामद लत्ताकपडा भैरहवा भन्सार कार्यालय बेलहिया रुपन्देहीमा बुझाईएको छ ।