काठमाडौं,
     सशस्त्र प्रहरी महानिरीक्षक शैलेन्द्र खनालले राष्ट्रिय सशस्त्र प्रहरी बल प्रशिक्षण प्रतिष्ठान मातातिर्थमा संचालित सि.सं. २१ गुल्मपति तथा स्टाफ तालिमको असार २७ गते सशस्त्र प्रहरी बल, नेपाल प्रधान कार्यालयमा आयोजित एक कार्यक्रमका बीच समापन गर्नुभयो ।
    सशस्त्र प्रहरी महानिरीक्षक खनालले त्यसअवसरमा तालिमका उत्कृष्ट प्रशिक्षार्थीहरुलाई पुरस्कार तथा प्रमाणपत्र प्रदान गर्नुभयो । उहाँले तालिमका प्रशिक्षकहरुलाई समेत प्रशंसापत्र प्रदान गर्नुभयो ।
सशस्त्र प्रहरी महानिरीक्षक खनालले सो अवसरमा फौजी संगठनमा तालिमको महत्वमाथी प्रकाश पार्नुहुँदै तालिमले व्यक्तिको बृत्तिविकासमा समेत महत्वपूर्ण भूमिका खेल्ने बताउनुभयो । 
उहाँले संगठनलाई प्राप्त जिम्मेवारीहरु कुशलतापूर्वक निर्वाह गर्नसक्ने दक्ष जनशक्ति उत्पादनका लागि यस्ता पेशागत तालिम अपरिहार्य रहेको चर्चा गर्नुभयो । 
सशस्त्र प्रहरी महानिरीक्षक खनालले यस्ता तालिमले प्रशिक्षार्थीहरुलाई प्राप्त जिम्मेवारी सहजताकासाथ बहन गर्न ज्ञान सिप अभिबृद्धि हुनुका साथै व्यावसायिक अधिकृत उत्पादन हुने विश्वास व्यक्त गर्नुहँुदै कार्यक्षेत्रमा आईपर्ने चुनौतीहरुको सामना गर्नसक्ने दक्ष क्षमतावान तथा कूशल अधिकृत उत्पादनमा यस्ता तालिमको महत्वपूर्ण भूमिका रहने बताउनुभयो ।
उहाँले यस्ता तालिमबाट प्राप्त ज्ञान सिपको अधिकतम उपयोग गरी जस्तोसुकै विषम परिस्थितीमा समेत उत्कृष्ट कार्यसम्पादन गर्न कृयाशिल रहनुपर्ने बताउनुहुँदै व्यावसायीक प्रशिक्षणले सक्षम, कर्तव्यनिष्ठ अधिकृत उत्पादन भई राष्ट्र र नागरिकको सेवा र सुरक्षामा प्रभावकारिता आउने बताउनुभयो ।  
सो प्रतिष्ठानका कार्यकारी निर्देशक सशस्त्र प्रहरी अतिरिक्त महानिरीक्षक रामशरण पौडेलले स्वागत मन्तव्यको क्रममा संगठनमा आवद्ध अधिकृत तहका राष्ट्रसेवकहरुको दक्षता अभिबृद्धि गर्ने उद्देश्यले संचालित यस्ता व्यावसायिक तालिमबाट प्राप्त ज्ञान सिपले कार्यक्षेत्रमा प्रभावकारी ढंगले जिम्मेवारी निर्वाह गर्न प्रशिक्षार्थीहरुलाई मद्दत पुग्ने विश्वास व्यक्त गर्नुभयो । 
उहाँले प्रशिक्षणको दौरानमा विविध विषयका आन्तरिक तथा बाह्य विज्ञ प्रशिक्षकहरुद्वारा सैद्धान्तिक एवं व्यावहारिक प्रशिक्षण प्रदान गरिएको बताउनुभयो । 
    गत चैत्र २६ गतेबाट संचालन भएको उक्त तालिममा सशस्त्र प्रहरी नायव उपरीक्षक एक जना तथा सशस्त्र प्रहरी निरीक्षक ३६ जना गरी कुल ३७ जना प्रशिक्षार्थीहरुको सहभागीता रहेको थियो ।    
    उक्त तालिममा सशस्त्र प्रहरी निरीक्षक लक्ष्मण बराल सर्वप्रथम भएका छन् भने सोधपत्रतर्फ सशस्त्र प्रहरी निरीक्षक बिरेन्द्र राउत उत्कृष्ट ठहरिएका छन् । 
    कार्यक्रममा सशस्त्र प्रहरी अतिरिक्त महानिरीक्षक नारायणबावु थापा लगायत सशस्त्र प्रहरी बल, नेपालका बरिष्ठ अधिकृतहरुको उपस्थिती रहेको थियो ।