काठमाडौं,
        कञ्चनपुर जिल्लाको महाकाली नगरपालिका १ गढीगोठ स्थित सीमा ईलाकाबाट साउन
८ गते एपीएफ टोलीले चोरीपैठारीको किराना तथा हार्डवयरका सामान बरामद
गरेको छ ।
        दुई वटा मोटरसाईकलमा राखेर ल्याउँदै गरेको उक्त सामान सशस्त्र प्रहरी
बल, नेपाल बोर्डर आउट पोष्ट बयलबन्दाबाट खटिएको एपीएफ टोलीले बरामद गरेको
हो ।
        त्यसवेला एपीएफ टोलीले उक्त सामान ल्याउन प्रयोग भएको दुई वटै मोटरसाईकल
समेत बरामद गरेको छ ।
        बरामद सामान तथा मोटरसाईकल भन्सार कार्यालय गड्डाचौकीमा बुझाईएको छ ।
बरामद सामान तथा मोटरसाईकलको भन्सार दाखिला मुल्य एक लाख ९२ हजार पाँच सय
रुपैयाँ रहेको छ ।
        यसैगरी रौतहट जिल्लाको गौर नगरपालिका २ स्थित महादेवपट्टि इलाकाबाट
भाद्र ८ गते एपीएफ टोलीले करीव एक लाख ४० हजार रुपैयाँ बराबरको
चोरीपैठारीको लत्ताकपडा बरामद गरेको छ ।
        भारतबाट अवैध रुपले ल्याउँदै गरेको उक्त लत्ताकपडा सशस्त्र प्रहरी बल,
नेपाल नम्बर ११ गण रौतहटबाट खटिएको एपीएफ टोलीले बरामद गरेको हो ।
        बरामद सामान गौर भन्सार कार्यालय रौतहटमा बुझाईएको छ ।