Raju Aryal Inspector General, Armed Police Force, Nepal
Rajendra Khadka Senior Superintendent, Armed Police Force, Nepal +977 - 9851272007 spokesperson@apf.gov.np
सशस्त्र प्रहरी बल, नेपालका पदक विजेता खेलाडी सम्मानित |
काठमाडौं, सशस्त्र प्रहरी बल, नेपालले आठौं राष्ट्रिय खेलकुद प्रतियोगिता–२०७५ मा नेपाल एपीएफ क्लबबाट सहभागी भई पदक जित्न सफल आफ्ना २ सय ४ जना खेलाडीहरुलाई नगदसहित सम्मान गरेको छ । सशस्त्र प्रहरी महानिरीक्षक शैलेन्द्र खनालले सशस्त्र प्रहरी बल, नेपाल प्रधान कार्यालयमा जेठ ०९ गते आयोजित बिशेष समारोहका वीच स्वर्ण पदक विजेता खेलाडीहरुलाई नगदसहित सम्मान गर्नुभयो । यसैगरी सशस्त्र प्रहरी अतिरिक्त महानिरीक्षकहरु पुष्पराम के.सी., नारायणबाबु थापा र रामशरण पौडेलले रजत र कास्य पदक विजेता खेलाडीहरुलाई नगद पुरस्कार प्रदान गर्नुभयो । प्रदेश नं. ५ को विभिन्न स्थानमा गत चैत्र २७ गतेदेखि बैशाख १२ गतेसम्म संचालन भएको उक्त प्रतियोगितामा नेपाल एपीएफ क्लबको तर्फबाट सहभागी भई पदक जित्न सफल खेलाडीहरुलाई सम्मान गरिएको हो । त्यस अवसरमा कूल १३ लाख ९५ हजार ५ सय रुपैयाँ पुरस्कार स्वरुप प्रदान गरिएको छ । सो कार्यक्रममा स्वर्ण पदक विजेतालाई जनही १० हजार रुपैयाँ, रजत पदक विजेतालाई जनही ७ हजार रुपैयाँ तथा कास्य पदक विजेतालाई जनही ५ हजार रुपैयाँसहित सम्मान गरिएको छ । यसैगरी एकभन्दा बढी पदक विजेता खेलाडीहरुलाई थप बिजयी प्रति पदकमा ५० प्रतिशत पुरस्कार रकम थप गरी प्रदान गरिएको छ । उक्त बिशेष समारोहमा सशस्त्र प्रहरी महानिरीक्षक शैलेन्द्र खनालले यस किसिमको सफलताले संगठनका सकल दर्जाका राष्ट्रसेवकहरुलाई गौरवान्वित बनाएको चर्चा गर्नुहुँदै राष्ट्र, राष्ट्रियता र नेपाली जनताको सेवा, सुरक्षा, सहयोग तथा उद्धारका अलावा खेलकुदको क्षेत्रमा समेत संगठनले आफ्नो सकृय सहभागिता जनाउँदै आएको उल्लेख गर्नुभयो । उहाँले सशस्त्र प्रहरी बल, नेपालले आफ्नो स्थानाकालदेखि नै विभिन्न खेलको विकासमा योगदान पु¥याउँदै आईरहेको चर्चा गर्नुभयो । सशस्त्र प्रहरी महानिरीक्षक खनालले राष्ट्रिय तथा अन्तर्राष्ट्रिय स्तरमा हुने खेलहरुमा उत्कृष्ट योगदान पु¥याउने खेलाडीहरुको हौसला तथा मनोवल बढाउनको लागि विगतका दिनहरुमा समेत सशस्त्र प्रहरी बल, नेपालले विशेष अवसर पारेर उत्कृष्ट खेलाडीहरुलाई पुरस्कृत गर्दै आएको स्मरण गर्नुहुँदै आगामी दिनहरुमा पनि यो परम्परालाई निरन्तरता दिईने बताउनुभयो । कार्यक्रममा सशस्त्र प्रहरी अतिरिक्त महानिरीक्षक रामशरण पौडेलले सम्मान कार्यक्रमको विविध विषयमा जानकारी गराउनुभएको थियो । उहाँले सो प्रतियोगिताको कूल ३५ विधा मध्ये २८ विधामा नेपाल एपीएफ क्लबका खेलाडीहरुले ५४ स्वर्ण पदक, ७१ रजत पदक र ७९ कास्य पदक गरी कूल २०४ पदकसहित तेस्रो स्थान हासिल गरेको कुरा जानकारी गराउनु भयो । |