एपीएफ टोलीद्वारा चोरीपैठारीको औषधी बरामद

12th May, 2017
सुनसरी, अवैध रुपले ल्याइएको विभिन्न किसिमको औषधी सुनसरी जिल्लाको देवानगञ्ज गाँउपालिका ४ स्थित सीमावर्ती इलाकाबाट एपीएफ टोलीले बरामद गरी आवश्यक कारवाहीको लागि बैशाख २९ गते स्थानीय भन्सार कार्यालयमा बुझाएको छ । करीव दुई लाख ११ हजार रुपैयाँ बराबरको उक्त औषधी सशस्त्र प्रहरी बल बोर्डर आउट पोष्ट कप्तानगञ्जबाट खटिएको एपीएफ टोलीले बैशाख २८ गते राति बरामद गरेको थियो । नम्बर प्लेटविनाको नयाँ युनिकन मोटरसाइकलमा भारतबाट नेपालतर्फ आउँदै गरेका व्यक्तिले गस्तीमा रहेको एपीएफ टोलीलाई देख्नासाथै मोटरसाइकल र औषधी छाडेर भागी फरार भएपछि एपीएफ टोलीले बरामद गरेको थियो । एपीएफ टोलीले त्यसवेला उक्त मोटरसाइकल समेत बरामद गरी आजै भन्सार कार्यालयमा बुझाएको छ । सशस्त्र प्रहरी निरीक्षक नवराज सापकोटाको कमाण्डमा गस्तीमा खटिएको एपीएफ टोलीले त्यसवेला अवैध चोरीपैठारीको जेनेग्रा, पेन्टाजोल, एम्पील, क्लियर किट, मेड्ली लगायतको औषधी बरामद गरेको थियो ।